[Deewan] introductory posting

[Sanjeev Ranjan]

Mitron,
        Main mooltah itihaas ka chaatr raha hoon aur vyavsaayik pravandhan ka bhi prakshikchan liya hai. Thori-bahoot abhiruchi darshan, Saahitya ityadi wishyon mein bhi rahi hai tathaa pichhle kuch dashkon ke darmayaan Hindi-belt mein ghatit ho rahee saamjik tabdiliyon ke gatishastra ke prati kaafi lagav mahsoos karta hoon. Sarai / C.S.D.S. swantantra sodhvriti ke tahat nayi taknikon ke dwara gyanavinimay ki sanhita mein, daliton ke sandarbh mein, ho rahi tabdilyon ka adhyayan main apne shodhkarya “gyan-vinimay kee nayee takneekain aur mail banaate dalit” ke dwara karoonga.
  Bharat mein gyan-vinimay ki prakriya kabhi bhi Jaati-nirpeksha nahee rahee hai. Praacheen kaal main gyan ke barchaswata-praapta shroton tak daliton kee pahooch durlabh thee. Bhakti-kaal ke daur mein neeche ke paaydaan par khare logon ne pahlee baar “Aayo gyan kee aandhi re” (Kabir), mahsoos kiya tha. Par, utpadan-vyavastha kee tatkaalin swarup ke chalte iskee apnee maryaadaaein thee. Jaati-nirpeksha shiksha-vyavastha kee shuruwat se haalaat badalne praarambha hue. Par, gyan ke janpad mein daliton kee aawajahi inke beech madhyabarg ke uday ke saath prarambh hua. Sabhi Chhetra mein inhone dastak diya, Aaatmakatha inkee priy saahityik vidha banee Jahan inhone apne saandra khatte-meethe anubhav darz kiye. Inhonein schoolon, collezon, librariyon evam hostalon ke anubhavon ke 0sahare aadhunik shikcha kee ghoshit jaati-nirpekshta ko samasyamoolak banaayaa. 
        Nayi taknikon ne gyana-vinimay ke maahaul ko kaafi-kuchh badal daala hai. Bibhinn shaikchhanik sansthanon ke dalit chhaatron ki ungaliyon ka computer ke keypad se sahaj rishta ban chukka hai. Main apne sodhkarya ke dwara jaanana chahoonga ki wahan ki sthiti kaisi hai, apne jaatigat pahchaan ka koee chinha chore bagair jab dalit tammam suchanaaye haasil karta hai, jinhe tatshadris sharton par hee koyee sawarn bhee haasil kar paataa hai to dalit kya mahsoos karte hain ? Gyan-vinimay ki puranee taknikon ke baraqs nayee taknikon ko rakhnein par kya niskarsh nikaala jaa sakta hai ? Nayee taknikon ke saath mel banaanein ke khel main inkee Jaatigat sthiti kahan kahan visible hotee hai ? Kahin aisa to nahin hai ki gyanarjan ke ye shrot itne sangharsh-mukt hain ki dalit saahitya ke roop mein darz kiya jaa sakne waala jaatigat anubhav yahan ghatit hi nahin hota hai ? yaa phir yahan anubhavon ko narrate karne par sthapit saahityakaaron ka varchaswa toot raha hai, jinka sthan naye
 asaahityik (?) cybersebi lenge ?
        Iske atirikta main ye Jaanane ka prayas karoonga ki gyan-vinimay ke printottar maadhyamo ke maarphat daliton ke dwara apne paros evam shesh duniya tatha iske beech apnee jagah kee khayali tasvir bananein ki prakriya mein kya paribartan hua hai evam ya daanhyam Jeevan-sailee mein nihit Jaatimulak tatvon ko kis trah asarangej kar rahe hain ?
        Apne shodhkaray ke dauraan hue anubhavon ke saath shighra hazir ho raha hoon. 
        Sujhawon kee pratiksha mein, abhivadan sahit 
Sanjeev
		
---------------------------------
Brings words and photos together (easily) with
 PhotoMail  - it's free and works with Yahoo! Mail.
-------------- next part --------------
An HTML attachment was scrubbed...
URL: http://mail.sarai.net/pipermail/deewan/attachments/20060301/3c481214/attachment.html